स्पॅम कॉल्स आणि ऑनलाईन फ्रॉड

सकाळी माझ्या बिजनेस ग्रुपच्या एका सरांचा मिस्डकॉल पाहिला.  मी झोपेतून उठण्याआधीच त्यांचा कॉल येऊन गेला होता.  मी कॉल केला तेव्हा ते थोड्या गोंधळलेल्या अवस्थेत वाटत होते.  मी शांतपणे समजून घेण्याचा प्रयत्न केला तेव्हा कळालं की सकाळी कुणीतरी त्यांना फसवून त्यांच्या अकाउंटमधून ५०००० रुपये काढले होते.  त्यांनी त्यांच्या चाकणच्या फ्लॅटचं लाईटबिल भरलं होतं. समोरच्या भामट्याने वीजवितरण केंद्रातून बोलतोय असं भासवून तुमच्याकडून जास्त अमाउंट भरली गेली आहे व ती परत करायची आहे असं सांगून त्यांच्याकडून ए. टी. एम कार्डसकट सगळी माहिती घेतली व पैसे लंपास केले.   त्यांनी लाईटबिल भरलंय हे त्या भामट्याला कसं समजलं हे अजून आमच्यासमोर प्रश्नचिन्ह आहेच कारण पोलीस कम्प्लेन्टनंतर त्याच लोकेशन ट्रॅक केल्यावर तो झारखंडचा निघाला. आतापर्यंत तुमचं कार्ड ब्लॉक झालंय आणि ते ओपन करण्यासाठी तुमच्या डिटेल्स द्या असे सांगणारे फ्रॉड कॉल बरेच आले होते पण अशी केस माझ्यासमोर पहिल्यांदा होती.  जर असं कुणासोबत झालं तर एकदम घाबरून जाऊ नका.  हे पैसे तुम्हाला परत मिळू शकतात.   कारण सरांचे पैसे परत मिळवण्यात आम्ही यशस्वी झालो.

असे फ्रॉड करून चोरलेले पैसे भामटा सरळ त्याच्या अकाउंटला घेत नाही.  तो असे पैसे दोन ठिकाणी फिरवू शकतो.

1. कोणत्याही शॉपिंग साईटवर नकली अकाउंट तयार करून त्यावरून शॉपिंग करू शकतो.

2. फोनपे, एअरटेल मनी, पे टी एम अशा पद्धतीच्या डिजिटल वॉलेटमध्ये पैसे ट्रान्सफर करू शकतो व नंतर त्यावरून शॉपिंग करू शकतो.  यातही मोबाईल नंबर त्याचा स्वतःचा नसतो.

असे झाल्यास आपल्याला लगेचच पुढील ऍक्शन घ्यायच्या आहेत.

१.  आपलं डेबिट किंवा क्रेडिट कार्ड कस्टमर केअरला फोन करून लगेच ब्लॉक करायचं.

२. आपल्या अकाउंटमधून नक्की कुठे पैसे ट्रान्सफर झाले आहेत ते बँक स्टेटमेंटमधून कन्फर्म करून घ्यायचे किंवा कस्टमर केअरला फोन लावून कन्फर्म करायचं.

३. जर पैसे शॉपिंग साईटवर वापरले गेले असतील किंवा कोणत्या डिजिटल वॉलेटमध्ये वापरले गेले असतील तर त्यांच्या कस्टमर केअरला (अमेझॉन असेल तर अमेझॉन कस्टमर केअर किंवा फोनपे असेल तर त्यांचे कस्टमर केअर) फोन करून आपले ट्रानजॅक्शन डिटेल्स द्यायचे व ती ऑर्डर स्टॉप करायला सांगून व तो अकाउंट ब्लॉक करायला सांगून पैसे रिफण्ड करायला सांगायचे.  आपली अकाउंट स्टेटमेंट, त्या बाबतीत आलेले एस. एम. एस यांचा स्क्रीनशॉट, ट्रानजॅक्शनचा टाईम, बँकेचे नाव व अकाउंट नंबर या सगळ्यांचा मिळून एक ईमेल सुद्धा पाठवून द्यायचा.

४. पोलिसांत तक्रार करायला विसरायचं नाही.

ही पाऊलं लगेच उचलली गेली व डिटेल्स कन्फर्म झाले की तुमचे पैसे तुमच्या अकाउंटला काही दिवसात पुन्हा येतात.  त्यामुळे असं काही घडलंच तर डोक्याला हात लावून बसण्यापेक्षा लागलीच कामाला लागा.

खालील गोष्टींची काळजी घ्या:

१. स्वतःचे महत्वाचे डॉक्युमेंट्स कुणाला मोबाईल सिमकार्ड घेण्यासाठी देऊ नका.  ते कार्ड तुमच्या नावावर रजिस्टर होत आणि अशा फ्रॉडमध्ये तो नंबर वापरला गेला तर तुम्ही गोत्यात येऊ शकता.

२. तुमचा ए. टी. एम. पिन किंवा मोबाईलवर आलेला ओ. टी. पी. कधीही कुणालाही शेअर करु नका.  बँका तर नेहमी याबाबतीत जाहिरात करत असतातच.

याव्यतिरिक्त काही असेल तर मी आहेच 😊

धन्यवाद,
सुबोध अनंत मेस्त्री
तुमचा तंत्रज्ञान मित्र
९२२१२५०६५६

#techiteasier #doyouknow #jeevanrang #ileadmylife #swarajyainfotech #onlinefrauds #spamcallers